23 مارس 2009

دمعة...وضحكة

دنيتنا حكاية كبيرة
فيها الدمعة وفيها الضحكة
واللي ما بينهم احلي حياة
دمعة بتجري علي خد حبيب
فعز شوقه سابه حبيبه
يتعب
يشقي
يحاول ينسي
ولما الدنيا تحن عليه
يرجع تاني لحضن حبيبه
وبدل الدمعة
ضحكة كبيرة تملي عنيه
ينسي معاها كل الامه
ويرجع تاني يعيش الدنيا
كأن الدمع ما جرحت عينه
دمعه طفل صغير نزلت
اول امه ما بعدت عنه
اصل الدنيا ميعرفهاش
الا في حضن حبيبه القلب
طيب اهدي
تأخد لعبة
هي حتيجي بعد شوية
واول بس ما يلمح طيفها
او حتي يشم ريحيتها
يضحك ضحكة ترج الدنيا
ومن حلاوتها تنور وشه
ويرجع تاني يعيش الدنيا
كأن دموعه ما نزلت يوم
دمعة نزلت من عين مظلوم
سهر الليل يدعو القيوم
يصبر
يرضي
يمكن يقوي
بس وربك حقك راجع
اصل ده وعد من الرحمن
واول حقه مايرجع ليه
يضحك ضحكة مؤمن صابر
ضحكة تخلي القلب يعيش
دايما علي ذكر الغفار
ويرجع تاني يعيش الدنيا
كأنه في يوم ما عاش مظلوم
اما الاغرب والاعجب
دمعة في وسط الفرحة بتنزل
بس بجد تهز القلب
اصل مفيش اغلي من الدمعة
اللي بتنزل وقت الفرحة
اومن كتر الهم بنضحك
ضحكة تخرج شحنة حزن
يمكن ننسي للحظة الامنا
ونعيش ويا الضحكة بجد
اصل الدنيا حكاية كبيرة
فيها الدمعة وفيها الضحكة
بس يارب
تغلب فيها الضحكة وتعلي
وتمسح اي اثار لدموعنا

ليست هناك تعليقات: