اولا انا بشكر حبيبتي صاحبة مدوتة اعترافات القلب لانها خصتني بالتاج الجميل ده
وكمان لانها من المدونات اللي بحبها وقريبة من قلبي
يارب اقدر اجاوب كويس وردودي تعجبكم بس من الاول انا حجاوب بصراحة
1- أذكر سته أسرار لا يكتشفها من يقابلك لأول مرة؟
في حاجات كتير محدش يعرفها غير المقربين او بالعشرة
عنيدة جداااا وده ممكن يكون عيب مش عارفة اغيره _ بسيطة اووووي علي عكس الظاهر _ لما بحب بكون غيورة لاقصي درجة _ متسامحة جدا جدا _ ومش بعرف اكره _ قلبي صغير اووي مش بقدر اشوف حد بيبكي او مجروح وخصوصا الدم
2-سبع حاجات نفسك تعملهم؟
نفسي اتجوز واعمل اسرة صغيرة بتحب بعض _ اسافر احج _ اتعلم السواقة واشتري عربية _ احفظ القرآن علشان بقالي فترة مبلطة في الخط _ اخلف ولد وبنت اسمي الولد حمزة والبنت نور
3-سبع حاجات ماعرفتش تعملهم؟
احافظ علي حبي الوحيد _ اثق في حد ويطلع ميستهلش _ يكون عندي اصدقاء كتييييييييييير اتلخبط في عددهم _ اشتغل في تخصصي العمارة _ اكون مطيعة لاهلي طاعة عمياء لاني بصراحة مشاغبة_اعمل خير كتيييييير جدا_اساعد اي حد محتاج
4-سبع حاجات دائما بتقولهم؟
بصي ياستي"لما ابدء الكلام مع صحباتي" _ تؤ تؤ"ديه علي طول" _ اه ثم "تنهيده عميقة توجع القلب" _ ربنا يكرمك"لما اي حد يعملي اي حاجة" _واو"دية للتعجب والدهشة" _ يالهوي _ايوووووة "لما حد يعصبني"
5- سبع مشكلات فى حياتك ممكن تحلهم بالفلوس؟
لا مفيش غير طبعا اني اشتري العربية اللي نفسي فيها وديه متعتبرش مشكلة انا بصراحة مبحبش الفلوس اصلها بتجيب وجع القلب
.6- سبع أماكن بتحبيها؟
اسكندرية _ البحر _بحري المكان اللي عايشه فيه _ كلية فنون جميلة _ بيتنا _ نفسي اروح اسوان _ شرم الشيخ
7- اشخاص بتحبهم غير ماما وبابا واخواتى؟
عامة بحب اصحابي وكل الناس واي حد احس انه اتظلم وكمان الاطفال بحبهم جدا
8- مدونين بتحب تقرالهم؟
اعترافات قلب علشان فيها حاجات بحس انها شبهي ومدونة كلمات كلامها من القلب ورومنسي حساس ورومانسي وكلام من القلب مبروك يادكتور علي الخطوبة والمضيفة كلماته صادقة يوميات بنوته صباح الصباح مركب ورق وديه اول مدونة اقراها وليها الفضل في دخولي عالم المدونات امراة من زمن الحب ومدونات كتييير جدا انا بتابعها خايفة انسي حد وكلها ناس محترمة ربنا يوفقهم
9- تمرر الواجب لمين
انا نفسي كل الناس اللي بحب اقرأ لهم يأخدو التاج وده طبعا لو يحبو
كلمات ورومانسي وكلام من القلب وصاحب المضيفة واي حد ياريت اصحابي كلهم يجاوبو
التاج التانى يارب وفقني 
1- لو كان ينفع تختار ومين الحاكم؟عصر تعيش فيه هيبقى امتى؟
بصراحة بحب العصر العباسي جدا اما الحاكم فهما اتنين ياعمر بن الخطاب ياعمر بن عبد العزيز
2- أول أولويه فى حياتك؟
اكيد طبعا ربنا وبعدهم اهلي واصحابي
3ـ أكتر حاجه بتحبها فى رمضان؟
لمة الفطار والفانوس والكارتون اللي بيجي ساعة الفطار والتراويح والسباق بيني وبين اختي علي ختم المصحف الشريف
4- أوصف أجمل فطار ممكن تفطره؟
فطار امي ربنا يخليها اجمل فطار
وكمان في الكلية عملنا مرة فطار جماعي كان تحفة عمري ما حنساه
5- لو كنت حاكم هتكون عادل؟,وحتعرف ازاي؟
اتمني طبعا لو اكون عادلة ولو اني محبش اكون حاكم دية مسئولية كبيرة قدام ربنا
حعرف حالة الناس وعيشتهم وساعتها حعمل زي عمرو بن الخطاب حتنكر وانزل بين الناس
6- مين أكتر إعلامى بتحبه؟
حمدي قنديل وساعات عمرو اديب
7- لو ممكن شغلانه تانيه تختار إيه؟
صحفية مع اني طول عمري نفسي اطلع مهندسة والحمد لله اتحقق حلمي
8-تانى بلد تحب تعيش فيه بعد مصر؟
المدينة المنورة
9-أوصف ترتيبات أجمل فرح ممكن تحضره؟
عروسه وعريس فرحنين ببعض والفرح منظم ومفيهوش اغاني سعد وبعرور
10- بتراعى كلام الناس والقيل والقال؟ وليه؟
يعني ساعات ساعات علي رأي صباح المهم رضي ربنا علشان مش بحب ازعل حد
11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟
والله اريح احمدك يارب
12-السعاده هى؟
الحب وراحة البال
13-عندك أمل؟ واسبابك؟
اه طبعا علشان ربنا موجود وبيقبل الدعاء
14- لما تحب تهرب من كل حاجه بتروح فين؟
بنام كتيييير جدا
15- أمتى أخر مره أخدت فيها نفس وقلت يااااااه أنا كبرت ؟
لما قبلت واحدة صحبتي من ايام الجامعة وقعدت تحكي لي علي اصحابنا اللي اتجوزت واللي خلفت واللي واللي.........حسيت ان الزمن عدي واحنا لسه معشناش طفولتنا وشبابنا
وكمان لما لقيت جروب علي الفيس بوك اتعمل مخصوص لاغاني الاطفال والبرامج اللي كانت بتتذاع زمان اسمه جيل العز ياجيل الثمانينات
16- بتشرب سجاير ولا لا ؟
لا طبعا
17- بتعرف ايدك الشمال ازاى؟
عندي شامة في ايدي اليمين
18- أكتر آله موسيقيه بتحبها؟
الكمان والناي "حنية وشجن"
19- ليه الزوق والنخوه انعدموا ؟
ببساطة مفيش ضمير ولا اخلاق زي زمان
20- إيه الحاجات اللى لو حصلت هتبقى سعيده؟
- ربنا يرضي عني حلاقي كل اموري اتظبطت وبقيت مبسوطة
21- تحب تملك أرض زراعيه ولا أحدث عربيات ولا كام عماره ولا فلوس فى البنك؟
الفلوس حتجيب كل ده المهم راحة البال وجنبه بيت صغير ومنظر جميل مع اللي يختاره قلبي
22- تحب البحر ولاالنيل؟
طبعا البحر ثم البحر ثم البحر
23- مركب ولا طياره؟
مجربتش بصراحة ومع اني بعشق البحر بس بخاف منه ممكن طيارة
24- شخص مجنون ولا عاقل؟
ههههههههه علي حسب اللي يشوفني يقول ايه العقل لكن 10دقايق ويغير طبعا رأيه من الاخر مجنونة
25- تقرأ كتاب ولا تتفرج على فيلم؟
ماليش في الافلام كتيري اسمع اغنية وازهق بس الكتب ديه هوايتي المفضلة
ايه ده الاسئلة خلصت
يارب مكنش طولت عليكم
