مكنتش اعرف ان الهوا قاسي كده غير لما قابلتكم
كنت فاكرة اني لوحدي اللي الهوا صابني ورماني
لكن عرفت ان اللي زيي كتير وحالهم اصعب من حالي
وبعد ما كنا غنوة بيتغي بيها العشاق وبينضرب بينا المثل
بقينا مجاريح الهوا
مكنتش اعرف ان دمعتي زي دموع كتير علي خدود البشر
كنت فاكرة اني الوحيدة اللي سهرت الليالي وعديت النجوم
لكن جمعنا ألمنا وسهرنا وقلوبنا الجريحة
وبعد ما كنا ورود جميلة بتتفتح علي نور العشق والهنا
بقينا مجاريح الهوا
مكنتش اعرف ان الفراق تعب قلوب كتير غيري
كنت فاكرة ان الآهات والانين هما قسمتي ونصيبي
لكن لقيت الحب والالم اصحاب ومتفقين علينا
وبعد ما كنا بنتمني نعيش الحب ونعرف اسراره
بقينا مجاريح الهوا
يمكن نكون احنا السبب والهوا برئ
يمكن اختيارتنا هي اللي غلط او حتي نكون مظلومين
يمكن لسه القدر شايل لنا الكتير
بس المهم اننا بقينا
مجاريح الهوا
ليست هناك تعليقات:
إرسال تعليق