لابلاش مش عاوزة اسمع
لو حتحكي عن جرح قلبك
لا خلاص مش عاوزة اعرف
اصلي بجد نفسي افرح
عاوزة اسمع كلام جديد
حد يحكي شوقه وحبه او حتي اسمع غنوة حلوة
لكن جرح والم
لا كفاية مش عاوزة اعرف
عاوزة حد ياخد بأيدي
انسي معاه جروحي والامي
يفتح لي ابواب السعادة
يفتح عيوني علي اجمل حياة
ولا اقولك
احكي وخلاص
اصلي زيك
نفسي حد يسمع كلامي
يعرف الآمي
يمكن الاقي عنده العلاج
وبصراحة
خايفة اكون من كتر جرحي
قلبي بقي زي الحجر
مبيتأثرش بدموع البشر
طيب احكي
حسمع بقلبي
عاوزة اعرف لسه بيسمع
ولا خلاص بقي اصم
ايه ده بس
ليه كده
مش بفكر غير في نفسي
لا حسمعك
حسمع كلامك
حسمع عشانك
واعرف حكايتك
يمكن اعرف انصحك
انا انصحك
طب هو ينفع
مجروح وينصح
ولا اقولك
انسي اللي فات
وابدء حياتك من جديد
وانا كمان حكون معاك
حعيش حياتي من غيرنكد من غير تعب
ومن غير متسائل
عارفة حتتعب
طيب نجرب
حنخسر ايه
يبقي اتفقنا
حنعيش حياتنا من غير الم
من غير ما نحكي عن الاسي
يمكن يودينا الامل علي دنيا تانيه
مفيهاش تعب
مليانة حب
يرسم بأيده ضحكة حلوة
مكان دموعنا
جايز ساعتها لما نحكي عن السعادة
الف مين حيسمع
ومحدش يقول
لاكفاية مش عاوزة اسمع
ليست هناك تعليقات:
إرسال تعليق