نفسك في ايه؟؟؟

نفسك في ايه؟؟؟

ايه حلمك اللي لسه مححقتهوش ؟؟؟؟؟

في حد يعرف يجاوب علي السؤال ده في حد عارف هو نفسه في ايه!!!!!!!!!!
ايوة طبعا اكيد
انا نفسي في وظيفة كويسة ,اتجوز شخص مناسب ,اعيش في مكان مريح ,وربنا يكرمني بذرية صالحة

اما انا فنفسي انجح في الامتحان , اجيب مجموع كبير يدخلني كلية محترمة وياريت تكون الدراسة فيها سهلة (علشان انجز يعني مش عاوزين تبليط) وبعد الكلية الاقي شغل بمرتب كبير واشتري عربية واعيش حياتي بقي

انا بقي الحمد لله اشتغلت بس لسه مش لاقي زوجة مناسبة نفسي الاقي بنت الحلال ويسلام لو اتجوز واجيب عيل شبهي ههههه

وكمان اقدر اسافر انا وهما لمكان هادي كده تبقي فل علي الاخر

نفسي اعيش حياتي من غير حد ما يضايقني ولا يتدخل في خصوصياتي اخرج وقت ما احب وارجع وقت ما احب انام اكل برحتي بقي ااضيها مع اصحابي ايه الحلاوة ديه

انت جيت علي الجرح!!!!! انا بقي نفسي افرح بعيالي اجوز الواد والبت واخلص من همهم واعيش الكام يوم اللي فضللي في روقان اروح اعمل حج ولا عمرة واخد المدام في رحلة صغيرة اهه يومين يغسلو شقي السنين اللي فاتت

ههههههههههه لو قلتلك انا نفسي في ايه مش حتصدق اصل انا نفسي ارجع شباب تاني

انا عارف انو مستحيل بس اديني بتمني

وساعتها اشوفلي بت حلوة كده من بتوع الاعلانات ولا واحدة قمر شبه نانسي ولا هيفا اتجوزها واعيش عمري اللي راح اونطة في الجري وري لقمة العيش حنعمل ايه خلاص فات العمر يا ولدي هههههههههه

وانت ياشبر ونص نفسك في ايه؟؟؟
انا نفسي اكبر واكبر علشان محدش يقولي يا شبر ونص !!!!! مش عاوز حد يقولي اعمل ده ومتعملش ده كده عيب ياولد انت قليل الادب اسمع كلام الكبار والكلام الي بالك في اللي دايما بنفضله اصل انا مكبر دماغي منهم علشان هما اصلا مش واخدين بالهم اني كبــــــــــــــرت

تعبت اووي من الغربة نفسي ارجع وسط اهلي واصحابي ما انا لو لقيت فرصة ولو صغيرة هنا مكنتش سيبت البلد بس حتقول ايه لازم اكون نفسي وابني مستقبلي

بدعي ليل نهار ان ربنا يقصر الايام هنا وارجع بلدي اكلها بملح في وسط اهلي

اصل الغربة مرة اووي حتي لو بتكسب ملايين

اما انا فأبني مسافرنفسي ربنا يطول في عمري واشوفه راجع بالسلامة اخده في حضني مسيبوش ابدا غير لعروسته ههههههههه اصل ده الغالي انا طبعا بحب كل اخواته بس هو بعيد عن عيني يارب توفقه وتسهله اموره هو واللي زيه

خلاص انا بقي نفسي اهج من البلد ديه من يوم ما اتخرجت وانا بلف علي شغل وقفت طوابير كتييير والسي في بتاعي بقي في كل شركة ومكتب بس حتعمل ايه حته الورقة ديه جنب كروت التوصية وده ابن فلان وده ابن علان ديه حاجة تقرف كل همي دلوقتي الاقي عقد عمل وادي دقني لو شوفتو وشي في البلد ديه تاني

نفسي في ايه......... نفسي في ايه......... اهه انا نفسي احب واتحب اعيش الرومانسية اللي بسمع عنها في الاغاني ومن صحباتي في النادي بس انا عاوزاه واد روش كده يخدني لعالم تاني قي عربيه احدث موديل اصل حكاية الحصان الابيض دية بقيت موضة قديمة

الملل عاوز اتخلص منه اقتله نفسي اغير الحالة اللي عايش فيها زهقان من الشغل والبيت حتي مراتي اتغيرت فين ايام الخطوبة كانت مرحة جذابة بتهتم بنفسها دلوقتي شايلة هم الدنيا مع ان الحالة متيسرة الحمد لله معندهاش وقت حتي نقعد مع بعض قاعدة حلوة كدة من بتوع زمان نفسي ترجع زي الاول ونعيش حياه هادية رومانسية اصل انا مش الرجالة اللي ممكن تعيش حياتها بره البيت لا انا بخاف ربنا

يا بختك ياعم انا بقي نفسي مراتي تتحمل المسئولية شوية ديه ست مهملة علي الاخر عايشة لنفسها وبس اهم حاجة عندها الميك اب والكوافير والموضة والجيم انا والبيت والعيال في ااااااخر القايمة انا بصراحة ساعات بحس اني متجوز الشغالة بشوفها اكتر ما بشوف المدام ولو عتبتها علي اهملها ترد وهي بتتعجب انا تعبا نفسي علشان اعجب سيادتك وانت بتشتكي صحيح الرجالة دول ميعجبهمش العجب

بحبها اووي وهي كمان بس اهلها مش موافقين نفسي ارتبط بيها واعيش معاها طول العمر انا عارف ان لسه قدامي المشوار طويل بس لو هي معايا وجنبي مستعد اعمل علشاها المستحيل

نفسي في حاجات كتييييير جدا بس ربنا يدينا العمر هههههههه يعني مثلا انا نفسي احفظ القرآن الكريم كله احج, التزم اكتر من كده, اعمل خير كتيير واساعد الناس ولو ربنا من عليا وعفني بالزواج اتمني يكون هو كمان ملتزم اصل نفسي ولادي يتعلمو من صغرهم اصول دينهم وححاول اعمل معاهم اللي كان نفسي فيه ومححقتهوش بس يارب اقدر

ســـــــــــــــــكــــــــــــــــــــــــوت كفاية كدة
ربنا يحقق لكل واحد اللي بيتمناه يارب بس يا جماعة شوية رضا وصبر
ايوة رضا بالحاجات الجميلة اللي نملكها ومن كتر ما احنا بندور علي غيرها مش حسين بقيمتها
وصبر علي ظروفنا اللي ممكن تكون حائل ما بينا وبين احلامنا وطموحتنا
انا عارفة ان الحياة من غير امل ملهاش اي معني وان ربنا امرنا اننا نعمل ونتقدم ونحلم بس حاسة اننا ساخطين علي حالنا
لو نرضا باللي معانا بالتأكيد حنكون سعدا جدا وحنسعي لتحقيق احلامنا بس واحنا مطمئنين
وده حيخلق جوانا نوع من الامل فلو لاقدر الله حلم من احلامنا متححققش منتصدمش نكمل علشان في حلم تاني الحمد لله اتحقق
رب اوزعني ان اشكر نعمتك التي انعمت علي وعلي والدي وان اعمل صالحا ترضاه وادخلني برحمتك في عبادك الصالحين